Tuesday, November 27, 2018

ደብተራን የሚያድን ጌታ!

ደብተራን የሚያድን ጌታ!

በቅርቡ ነው ዩትዩብ ከፍቼ አንድ መንፈሳዊ ጉባኤ ላይ ማይክራፎን በእጁ ይዞ። ያለ ምስል ከፊት ለፊት ገጽ ላይ  አየሁ ፤ ሁለት ጊዜ ገጹን ስጫን ከፈተልኝ ፤ አጠር ካለ ማስታወቂያ በኋላ አንድ ከጥቂት ዓመታት በፊት የማውቀው ሰው ለጉባኤ ምስክርነቱን እየሰጠ ይታያል። ምስክርነቱ እንደዚህ ነው ተቀጥሮ በሚሰራበት NGO ድርጅት ለስራ ወደ አንድ ራቅ ያለ ቦታ ሲጓዙ...  በጣም ረጅም ከሆነ ገደል ውስጥ እርሱንም ይሁን ይዟቸው ይጓዝ የነበሩ የውስጥና የውጭ አገር ሰዎችን ጌታ በተዓምር እንዴት እንዳተረፋቸው ተናግሮ ጌታን ከጉባኤው ግልር እያመሰገነ ነበር። ከዚህ ሰው ጋር ከ10 ዓመት በፊት አዲስ አበባ ውስጥ ከሳሪስ ወደ ስታዲየም የሚሄድ ታክሲ ውስጥ በጋቢናው በኩል ተሳፍሬ ስጓዝ ነበር የተዋወቅነው፤ በወቅቱ ሲጃራ ያጨስ ነበር፣ የሲዲ ማጫወቻው ደግሞ መዝሙር ይዘምራል ፤ በእኔና በሹፌሩ በኩል የነበረ ተሳፋሪ በመሃል እንደወረደ እኔ ወደ ሹፌሩ በኩል ወደቀረበው ጠበብ ያለች የመሃል ወንበር ፎቀቅ አልኩ...እናም "ወንድም! መዝሙሩና ሲጃራው እኮ አይሄድም! ከሚል አስተያየት ንግግሬን ጀመርኩ ...እንድ ሁለት እየተባባልን፣ እያወጋን ተጉዘን የምወርድበት ቦታ ከመድረሱ በፊት አድራሻ- ማለቴ ስልክ ተቀያየርን ፤ ስማችንን እርስ በርስ ተዋወቅን..ሄኖክ እባላለሁ አለኝ ..። ሁለት ወር ያህል አልተገናኘንም ምክንያቱ ደግሞ የእርሱ ስልክ አይሰራም ነበር፤ አንድ ቀን ግን ነግሬው በነበረ አድራሻ ፈልጎ በር አንኳኳ ..ተገናኘን.. ጸሎት ቤት አስገብቼ ጥቂት የሆድ የሆዳችንን አወጋን...በአጭሩ ከአጋንንት ጋር ተባብሮ የሚሰራ፣ብዙዎችን በጥንቆላ ያሳተ፤ በድግምት ለሃብታሞች የሚመትት፤ እንደነገረኝ መተት ሰርቶላቸው ውጭ አገር የሄዱ፣ ንግድ የሰመረላቸው፣ የሚዘፍኑ፣ የሚሮጡ..ምን ልበላችሁ ሁሉ ነገር ከተማ ውስጥ ንጹህ አይመስልም! ተነካክቷል። አንዳንዶቹ ከውጭ አገር በሚልኩት ገንዘብ ሁለት ሚኒባስ ገዝቷል። አንዱ እኔ ባለፈው ዕለት የተሳፈርኩበት መሆኑ ነው...የጥንቆላው መንፈስ የተወራረሰው ...ገዳም ውስጥ ነው። አባቱም ድግምት የሚሰሩ ደብተራ እንደሆኑ ነግሮኛል። ሁለት ልጆችና ...ሌላ አንድ ልጅ አለው፤ ለሁሉም ኃላፊነት አለበት። ማለቴ ወጪዎች አሉበት።...ብዙ ከሰማሁት በኋላ ቃል ክርስቶስ ኢየሱስ ከዚህ ሁሉ ነጻ ሊያወጣህ ይችላል! ዛሬ ራስህን ወደህ ትሰጠዋለህ ወይ? አልኩት። እፈራለሁ!  ኪዳን ከአጋንንት ጋር ስለገባሁ ይገድለኛል አለኝ፤ ጌታ ኢየሱስ ነው የሚበልጠው አይገድልህም! አልኩት...እሺ ብሎ ጌታን እንደ ግል አዳኙ አድርጎ ተቀበለ..ንስሐ ገባ። ክፉ መንፈስም ጮሆ ወዲያው ከእርሱ ወጣ ፤የቀረም ነበር ለካ ..ሌላ ጊዜ በህብረት ጸሎት መካከል ራሱን ገልጦ ከእርሱ ጮሆ ወጣ። ብዙ ትግሎች አሳልፎ፣ ደህንነት ትምህርት ጨርሶ፣ በአብ በወልድና በመንፈስ ቅዱስ ስም የውሐ ጥምቀትን ወሰደ። ይኽው ስንት ዓመት ጌታ ተሸክሞት...እኔ ከአገር ብወጣም ጌታ ከእርሱ ጋር ሆኖ ከክፉ ሁሉ እያዳነው መሆኑን ዩትዩብ ያለሁበት ድረስ ምስክረነትን ይዞልኝ መጣ። ለሰዎች ከመሰከርን በኋላ ለመንፈስ ቅዱስ አሳልፎ መስጠት ያለውን የላቀ ትርፍ አይቻለሁ። ሰዎች ምንም ያህል እስራት ውስጥ ቢሆኑ ጌታ ነጻ ሊያወጣቸው ይችላል። ለማንኛውም ሰው  ከመሰከራችሁ በኋላ ማድረግ የሚገባችሁን ብቻ እያደረጋችሁ ቀሪውን ለመንፈስ ቅዱስ ተውለት። ውጤቱን ታያላችሁ!  ጌታ ይባርካችሁ ይቀጥላል…
   <<Let us be witnesses for Christ!>>
          benjabef@gmail.com

በቤሩት-ሊባኖን የተፈጸመ!

በቤሩት-ሊባኖን የተፈጸመ!
    ******************
  የእግዚአብሔር ቃል "ወደ ዓለም ሁሉ ሂዱ፤ ወንጌልን ለፍጥረት ሁሉ ስበኩ፤" ማር.16፡15 እንደሚል፤  የዳነችበትንና የገባትን ወንጌል በዓረብ አገር ላገኘቻቸው አንድ ቤተሰብ ስትመሰክር ስለገጠማት አስደናቂ ነገር እህታችን ነጻነት ተከታዩን ታሪክ አጫውታኛለች:-

እ.ኤ.አ. 1997  በኤጀንሲዎች በኩል ተቀጥሬ ለሥር ወደ አረብ አገር ለመሄድ ተነሳሁ። ለመብረር ሁለት ቀን ሲቀረኝ ...አንድ አገልጋይ አገኝኝና ሲጸልይልኝ  እንዲህ የሚል መልዕክት ተናገረኝ " እህቴ ሆይ የምትሄጅው ለወንጌል አገልግሎት ነው! በዚያ ለስሜ ትመሰክሪያለሽ! ይልሻል፤" የሚል ነበር፤ አገሩ ቤሩት -ሊባኖን ይባላል፤ የተቀጠርኩበት ቤተሰብ በቁጥር 7ት ያህል ሲሆኑ ከእነዚህ ውስጥ 4ቱ ልጆች ፣ እናትና አባትን ጨምሮ አያታቸው (የሰውየው እናትም) አንድ ላይ ነበሩ። ከ4ቱ ልጆች 3ቱ ዩንቨርስቲ የተመረቁ ሲሆኑ አንድ ልጅ ብቻ ገና በትምህርት ላይ ነበረ።

ቤተሰቡ የካቶሊክ አማኝ ቢሆኑም ያን የሚያህል አጥባቂ አይደሉም፤ እንደውም በቤታቸው ፊት ለፊት አንድ ወፍራም ዛፍ አለ፤ አጠገቡም  በመስታወት የተከበበ ሻርቤል ተብሎ የሚጠራ ጣኦት ፤ በየጊዜውም ልዩ ልዩ ስጦታዎች የሚቀርቡለት  ነበር። ....እንደሄድኩ ሰሞን በር እየቆለፉብኝ ተቸግሬ ነበር፤ ስለዚህም በጥንቃቄ ነበር የምኖረው፤ እኔ እንደገባኝ ስጋታቸው  ጠፍታ ሌላ ቦታ ትሄድብናለች ! የሚል ጥርጣሬ ነው፤ ወደ ዓረብ አገር እንደዚህ  ተቀጥረው የሚሄዱ ሰራተኞች ባልተመቻቸው በማንኛውም ሰዓት ጠፍተው ይወጡና  በሌላ ደላላ ሌሎች ቦታዎች ላይ የመቀጠር ልማድ አለ። እኔ ትንሽ ተስፋ ልሰጣቸው ሞከርኩ! ...አይዞአችሁ እኔ ክርስቲያን ነኝ! የትም  ሄጄ አልጠፋባችሁም፤ ብዬ ላረጋጋቸው ሞከርኩ፤ ማዳም አለፍ አለፍ ብላ ጥያቄ ትጠይቀኝ ነበር ...ስለላ ቢጤ  መሰለኝ! ስለ እኔ ማንነት የበለጠ ለማወቅ ትፈልጋለች፤ ይሁንና በደፈናው ክርስቲያን ነኝ! ከማለት ውጪ ስለ አማኝነቴ በዚህ ፍጥነት ለማስታወቅ አልፈለኩም ነበር። ስራዬን በትክክል እሰራለሁ፣ ጌታን በሕይወቴ ለማሳየት እጥራለሁ፤ በቃ ከዚያ ጌታ የፈቀደው ይሆናል፤...  አየሩንም ሆነ የቤተሰቡን ሁኔታ በተወሰነ መልክ እየተላመድኩ መጣሁ፤ ... እስትንፋሴ እስካለች ድረስ መቼም ቢሆን የትም፣ ከምንም ነገር በላይ ማስረዳትና  መናገር የምፈልገው አንድ ብርቱ ዜና አለ! ይኽውም የዳንኩበት የጌታዬ የኢየሱስ ክርስቶስ የወንጌል ጉዳይ ነው። እናም እግዚአብሔር ዕድሉን ሰጠኝና ወንጌልን በዓረብ አገር ሁሉ ተዘዋውሬ ባልሰብክ እንኳ፤ ቢያንስ ባለሁበት ቤት ውስጥ ግን ምስክርነቴን መጀመር እንዳለብኝ ገብቶኝ የአቅሜን አድርጌያለሁ።

የዳንክበትን ወንጌል የትስ ቢሆን እንዴት ልትደብቅ ትችላለህ?... አንድ ቀን ቤቱን እያስተካከልኩ ሳለ የአረብኛ መጽሐፍ ቅዱስ አየሁ፤ እርሱን መነሻ አድርጌ ውስጤ የታፈነውን ምስክርነት የምጀምርበት  ሆነኝ! ልጆቹን ይሄ ምንድን ነው? አልኳቸው፤ መጽሐፍ ቅዱስ ነው! ብለው መለሱልኝ፤ ታዲያ ለምንድን ነው? ስታነብቡት የማላያችሁ? ብታንነቡት እኮ መልካም ነው! ማንም አንዳች አልመለሱልኝም። ጥቂት ግፊት ማድረግ ጀመርኩና ማታ ማታ አብረን ማንበብ ጀመርን፤ እነርሱ አረብኛውን ማንበብ ይችላሉ፤ እኔ ደግሞ አማርኛውንና እንግሊዘኛውን ቨርዥን እያፈራረቅኩ አነባለሁ፤ በንባባችን እየገፋንበት መጣን፤ በተለይም አንደኛዋ ልጅ በደንብ እየወደደችው መጣች። የልጅቷ ስም ሞንያ ነው።

  ሁለተኛ ጊዜ ለቤተሰቡ ስለ ወንጌል የምናገርበት  ሌላ ዕድል ተፈጠረ፤ ነገሩ እንደዚህ ነው፤ ማዳም አንድ ቀን ጠዋት የጣኦት ቤቱን ሄጄ አዋራውን እንዳጸዳ ትዕዛዝ ሰጠችኝ፤ እኔም ውስጤ በኃይል ተቆጥቶ አላደርገውም! አልኳት፤ ማዳምም ለምንድን ነው? የምልሽን የማትታዘዢኝ? አለችኝ። በዚያ ጊዜ ልትመታኝ ትችል ነበር፤ እኔም በወቅቱ ይህን ግምት ውስጥ አላስገባሁም ነበር።  እናም መለስኩላት  መጽሐፍ ቅዱስ አምጥቼ ዘዳግም 5 ላይ ያለውን ቃል አነበብኩላት ፤ እርሷ የተማረች ነርስ ናት፤ ቢሆንም የመንፈሳዊ እውቀት ግን አልነበራትም።  ቃሉን አምጥቼ አነበብኩላት እንዲህ ይላል "በላይ በሰማይ ካለው በታችም በምድር ካለው ከምድርም በታች በውኃ ካለው ነገር የማናቸውንም ምሳሌ የተቀረጸውንም ምስል ለአንተ አታድርግ ፤...አትስገድላቸው! አታምልካቸውም።" ዘዳ.5:8-10። ስለዚህ  እግዚአብሔር ጣኦትን ይጠላል! አልኳት። ለጊዜው መልስ አልሰጠችኝም። ሞንያ ግን ይህ ያነበብሽው እኮ የድሮ /የብሉይ ኪዳን/ ህግ ነው! አሁን ሊሰራ አይችልም! አለችኝ። እኔም" ዓይን ስለ ዓይን ፣ ጥርስም ስለ ጥርስ " (ምናልባት ጥርስህን ለሚያወልቅህ ጥርሱን አውልቀው! እንደማለት ነው) የሚለው ነው ተሽሮ አንድ ጉንጭህን በጥፊ ለሚመታህ ሌላኛውን አዙርለት፣...አንድ ምዕራፍ ለሚጠይቅህ ሁለት ምዕራፍ አድርግለት፣..(ማቴ.5፡38-42) ፤ ...እንዲህም ስለሚመስል ነገር እንጂ ከእኔ በቀር ሌላ አምላክ አታምልክ፤ ወይም አትስረቅ፣ አታመንዝር! የሚሉት ትዕዛዛት  ለዘላለም የማይሻሩ ናቸው! ብዬ አስረዳኋት። አሃ..! አለችና ጭንቅላቷን ነቅንቃ ጥቂት ዝም አለች ፤ ሲመስለኝ ቃሉን እየተረዳች ነው፤ እግዚአብሔርም በልጅቷ ህይወት ውስጥ አንድ የሆነ ዓላማ ያለውም ይመስለኛል ። ብዙ ጊዜ ስራዬን በጊዜ ጨራርሼ መጽሐፍ ቅዱስን እንድናነብ የበለጠ ፍላጎት ስላሳየችኝ ይህንን ለማድረግ ተጋሁ። ...በተለይ ወንጌልን በደንብ አድርጋ ነው የተማረችው፤ ጥቅስ አወጥተን እናነባለን ፤...እያንዳንዱ ታሪክ ይመስጣል፣ ህይወት ሰጪው ቃል በየማታው በውስጧ ይንቆረቆራል።

  ነገሩ በእንደዚህ ሁኔታ እየቀጠለ ሳለ አንድ ቀን ቤተሰቧ ከካናዳ የመጣ ባል አዘጋጅተውላት ነበረና ከመቅጽበት እቤት ውስጥ ወሬው ሁሉ እርሱ ሆነ፤ እኔ በጣም ተጨነቅኩ! ጠላት ይህን ሰበብ ፈጥሮ ከኔ ሊለያት ነው አልኩ፤ እስካሁን የለፋሁበትም ገደል ሊገባ ነው ? ብዬ መጸለይ ጀመርኩ፤ ሰውየው ሃብታም ቢጤ ነው ሲባል ስምቻለሁ፤ ያው ደግሞ ዘመዳቸው ነው፤ በባህላቸው መሠረት ሊባኖናውያን ከአክስትና ከአጎት ልጅ ጭምር ጋር እርስ በርስ ጋብቻሞች መሆን ይችላሉ መሰለኝ። ሰውየው አንድ ምሽት ላይ ጠቅላላ ቤተሰቡን እራት ሊጋብዝ ነው ተብሎ ተለቅ ወዳለ ስመጥር ሆቴል ለመሄድ ሲዘጋጁ ሳለ እኔም   እንድዘጋጅና አብሬያቸው እንድሄድ ተነገረኝ። እኔ ግን እራሴን አሞኛል! በሚል ሰበብ እንደማልሄድ ገለጥኩላቸው። ለነገሩስ የሞንያ ነገር ስላሳዘነኝ ጌታ ጣልቃ እንዲገባ ለመጸለይ አስቤ እንጂ አሞኝ አልነበረም የቀረሁት። ሞንያ ወደ እራት ስፍራ ከመሄዷ በፊት ወደ እኔ መጥታ <..ግን ምን ይመስልሻል?> አለችኝ። ውሳኔው የራስሽ ቢሆንም በፍጹም የማያምን ሰው ጋር  መጋባት ግን አለብሽ ብዬ አላምንም! አንቺ ማግባት ያለብሽ እንዳንቺ ክርስቶስን የሚያምን ክርስቲያንን ነው...።  ሁሉም ተከታትለው ሲሄዱ እኔ ተንበርክኬ መጸለይ ጀመርኩ፤ ከሰዓታት በኋላ ሞንያ ብቻዋን በመኪናዋ ወደ ቤቷ መጣች፤ ..ብዙ ነገር አላስደሰታትም መሠለኝ! እራት ብቻ በልታ፥ ጭፈራ ስትጋበዝ አምልጣ ነው የመጣችው፤ ቤተሰቡ ገና አልመጣም። ሰውየው ተናዷል አሉ! ቤተሰቦቿም በልጃቸው ድርጊት ተበሳጭተው ፊታቸው ፍም መስሎ ነው የተመለሱት። በቃ እልወደደችውም! ጌታ ጣልቃ የገባ ነው የሚመስለኝ! ትላለች ነጻነት።

እነ ሞንያ ቤት ከገባሁበት ጊዜ አንስቶ የሚረብሸኝ ሌላው ነገር ቅጥ የሌለው የዘፈን ድምጽ ነው፤ ሞንያ በጣም ነበር ዘፈን የምትወደው፤ ስትዘፍን፣ ስትደንስ" ነፍሷንም አታውቅ" ነበር። ዛሬ አልጨፍርም! ብላ ንቃ መጣች! እቤት ውስጥም ቢሆን ጸጥታ ሰፍኗል። ይህ ጉዳይ ደግሞ ቤተሰቡን አሳስቦታል። ይህች ልጅ ምን ሆና ነው የተቀየረችው? ይባባላሉ፤ በማናቸውም ሰዓት ያን ለብዙ ጊዜ ዝም ብሎ የተቀመጠ መጽሐፍ ስታንብ ነው የምትታየው። <ከነጻነትና ከዚህ መጽሐፍ ራስ ላይ አንወርድም!> የተባባሉ ይመስላል። ምክንያቱም እኔ ላይ ፊታቸውም ሆነ ቃላታቸው ተለውጧል። ትንሽ መፍራት ጀመርኩ!  ከአገራቸው  እንኳ ሊያስባርሩኝ ይችላሉ ብዬ ሰጋሁ። በተለይ በተለይ ግን በዚህ ሁኔታ ከሞንያ ጋር እንዳያለያዩን ነው ዋናው ስጋቴ። ሁሉም ሰው ልጅቷን ያበላሸችው ነጻነት ነች! ሲባል እየሰማሁ ነበር። ወይ ዓለም! ዘፈን፣ ጭፈራ፣ ስካር፣ ዝሙት ..መተውን <መበላሸት!> ብለው ነው የሚገልጹት፤ የሚጠቀሙበት ዲክሽነሪ ምን ዓይነት ነበር..?! ይገርማል!

የሆነ ቀን ቤተሰቡ አንድ ከባድ ውሳኔ ወሰነ፤ ውሳኔው ሞንያና እኔ በምንም መንገድ  አብረን እንዳንገናኝ ነበር ። አንዳንድ ጊዜ <ኪችን> ስንገናኝ ከቤተሰቡ መካከል አንዳቸው ይመጣሉ፤ በመሃላችን ይገቡና ይለያዩናል፤ እርሷም ወደ ሌላ ክፍል ትሄዳለች። ስለዚህ ሞኒያ ዘዴ ዘየደች። ዘዴውም እንዲህ ነው፤ ሁሉም ከተኙ በኋላ በሌሊት ከክፍሏ ወጥታ ወደ እኔ ትንሽ ክፍል ትመጣለች፤ የተወሰነ ሰዓት የእኔን ጋቢ ትለብስና ታጣፊ አልጋዬ ጥግ ትንበረከክና አብረን እንጸልያለን። ጥቂት ጊዜ በዚህ ሁኔታ እያሳለፍን....፤ አንድ ቀን ልዩ ነገር ሆነ፤ ሞንያ በመንፈስ ቅዱስ ተሞላች! በልሳን መናገር ጀመረች! እኔ ደስታዬ ወደር አልነበረውም፤ እርሷ ግን ምን ሆኜ ነው? ብላ ስትደነግጥ፤ ስለ መንፈስ ቅዱስ አሰራር ከቃሉ ላይ አስረዳኋትና ተደነቀች። ከዚያ በኋላ ባሰባት! በተገናኘን ቁጥር እንጸልይ ብቻ ነው የምትለው።

በ15 ቀን አንድ ጊዜ እረፍቴ በመሆኑ ከቤት ውጥቼ አንዳንድ ቦታ እሄድ ነበር። በእርግጥ ብዙ ጊዜ የምሄደውና የማልቀርበት ቦታ ቤተክርስቲያን ነው። የምታደርሰኝ ደግሞ ሞንያ ነች። ብዙ ጊዜ እኔን ቸርች አድርሳኝ እርሷ ትመለስ ነበር። አሁን ደግሞ ያ ቀርቶ፥ አብራኝ ገብታ በአበሾች መካከል ፥ ቋንቋው ባይገባትም በእማርኛ ዘምራ ፣ አምልካ መውጣት ጀመረች። ሌላ ጊዜ ደግሞ እየሆነ ያለውን ታሪክ ያጫወትኳት አንዲት አበሻ እህት ጥቂት የዳኑ አረቦች ተሰባስበው የሚጸልዩበትን ቦታ ጠቆመችንና ወደዚያ ሄድን። ...ይህማ ቋንቋዋ ነው፤ በአረብኛ ቃል ሰማች፤ ጌታን አመለከች....ደስ አላት፤ የአገሯን ሰዎች አገኘች። ከዚያ ስትመለስ እቤት ውስጥ በግልጽ መመስከር ጀመረች! ፍርሃት ቀረ!

የዚህ ሁሉ ምክንያት ነጻነት ነች! ተብዬ ቤተሰቡ የበለጠ ስለጠመደኝ፥ አትገናኙ የሚለው ህጋቸው እስካሁን አለ። ይሁንና ለቃል ረሃብተኛዋ ልጅ በኪሴ ጥቅስ እይዝና ወደ ማዕድ ቤት/Kitchen / እሄዳለሁ ፤ ቀስ ብላ ትመጣና ጥቅሱን እንቀባበላለን ፤ በዚህ ሁኔታ መጽሐፍ ቅዱስን እያነበበች ትውላለች፣ ታመሻለች። ከጊዜ በኋላ -ነገሩ በጣም እየከረረ ሲሄድ ከቤታቸው እንድወጣ ተፈረደብኝ። አንድ ቀን ቸርች ደርሼ ስመጣ ግቢው ውስጥ ጠቅላላው ቤተሰብና ጎረቤት ተሰባስበዋል፤ እንደገባሁ በይ! "ልብስሽን ያዢና ውልቅ በይ!" ተባልኩ። ያን ጊዜ የት እንደምሄድም አላውቅም፤ በመካከላቸው ሞንያን አላያትም፤ የት ሄዳ ይሆን? አልኩ በልቤ፤ በኋላ ስሰማ ክፍሏ ውስጥ ነበረች። እንዴት ወደ ውጭ  እንደወጣች አላውቅም፤ ከደቂቃዎች በኋላ ወደ ስብስቡ ቀረበች!...አለቀሰች! እኔ ሻንጣዬን ይዤ-- ፣ ታናሽ እህቴም አጠገቤ ነበርች፥ ልንወጣ ነው፤... <እኔን ለማን ትተሽ ነው የምትሄጂው? አለችኝ።> አንጀቴ ተላወሰ! ቢሆንም ቆፍጠን ብዬ አይዞሽ! ይህ ቤተሰብ ሁሉ ቆይተው ወደ ጌታ ይመጣሉ። ቃሉ" አንተ እመን ቤተሰብህም ይድናል!" ይላል አልኳት / በጊዜው የመጣልኝ ቃል ነው/፤ አንቺ ቤተሰብሽ ጋር አብረሽ ሁኚ! አልኴት። ...በነገሩ ብግን ብላ ነው መሰል፥ አክስቷ ተንደርድራ መጥታ አንድ ጊዜ አቀመሰችኝ! ንዴቷ ከፊቷ ላይ ይነበባል! ኽረ...በደንብ አድርጋ ነው ያቀመሰችኝ! የልቧ የደረስላት እንኳ አይመስለኝም፤ እኔ ደግሞ አንድ ጊዜ ጸጋውን አብዝቶልኝ የለ!? <ማዳም ሆይ እወድሻለሁ! /I love you!> አልኳት፤ <መበዴ!> አለች፤ በአረብኛ <አልፈልግም!> ማለቷ ነበር። ሞንያ ክፍሏ ገብታ ተንሰቅስቃ አለቀሰች፤ ወደ እናቷም መጣችና፥ ማማ ዛሬ የዚህን ቤት መብራት እንዳጠፋሽ እወቂው ? ብላት ገባች።...

ቤታቸው በኖርኩበት ጊዜ ያልመሰከርኩለት አባታቸውን ብቻ ነው፤ ስለ ሌሎቹ ምንም የሚቆጨኝ ነገር የለም። ከወጣሁ በኋላ እዛው አገር ሌላ ቦታ ስራ ጀመርኩ። ይሁንና የሞንያ ቤተሰቦች ሞንያን ወደ ጋና እንደላኳት ቆይቼ ሰማሁ። አባቷ ለስራ ጉዳይ ወደዚያ አገር ይሄድ ነበርና፤..ዶክመንቷን፣ ፓስፖርቷን ቀምተው ሰው አገር ወስደዋታል/አፍሪካ/። ትንሽ አዘንኩ! ግን ጌታ አዋቂ ነው።

እ.ኤ.አ.2000 ላይ ከሞንያ ጋር በደንብ ተለያየን። ጋና ምን ገጥሟት ይሆን? ህይወቷ እንዴት ሆኖ ይሆን? ...በልዑል እግዚአብሔር ፊት ከመጸለይ በቀር ምን ማድረግ እችላለሁ? እኔም ከጥቂት ዓመታት ቆይታ በኋላ አሜሪካን አገር ገባሁ፤ እርሱም የራሱ ታሪክ አለው፤ እህቴ ቀደም ብላ ወደ አሜሪካ መጥታ ነበር።

ከሞንያ ጋር ከተለያየን ድፍን 18 ዓመት ሞላን። አንድ ቀን ስልክ ተደወለ! ቁጥሩ የዱባይ ነው። ሠላም ለእናንተ ይሁን! ማን ልበል? የወንድ ድምጽ ይመስላል! መጋቢ በርናባስ እባላለሁ አለ! ...እሺ ምን ልታዘዝ? አኧይ.. አንድ ጓደኛሽ ነች ስልክሽን የሰጠችኝ! ለአገልግሎት ሊባኖን ሄጄ ሞንያ ከምትባል  ሴት ጋር በድንገት ተገናኘን፤ ..እንዴት ጌታን እንዳገኘች፤ የህይወት ምስክርነቷን ስታጫውተኝ ቆየን...በአንዲት አበሻ ሴት አማካኝነት ብላ በዋናነት ስለ አንቺ አነሳች፤... ወደ ጋና ሄዳ ስትመለስ አንቺን ማግኘት አልቻለችም ፤ አፈላልጋ፣ አፈላልጋ ደክሟት ሳለ፤ ከእኔ ጋር ሰሞኑን  ተገናኘን...አንቺን የሚያውቅሽ ሰው ሳጠያይቅ ነበር፤ በእግዚአብሔር ቸርነት የምታውቅሽን አንድ  እህት ዱባይ አገኘሁ እናም... ደወልኩልሽ። ቃላት ጠፋኝ....ዝቅ ብዬ መሬቱን ሳምኩት! ወደ ስልኩ ተመለስኩና...እባክህ ሞንያን አሁን እንዴት ማግኘት እችላልለሁ? ስል ጠይኩት፤ ይኽው ቁጥሯን ልሰጥሽ  አለኝ! ተቀበልኩት !

የሞንያ ቁጥር ላይ ደወልኩ፤ ስልኩ ተነሳ፥ በጌታ ልጄ፣ እህቴ ሞንያ... <ሄሎ!> አለች። ክብር ለጌታ ይሁን!!! ይህ የሚገርም አምላክ...አሁን ጉጉቴ 18 ዓመት ሙሉ እንዴት እንዳሳለፈች መስማት፤ ደግሞ አሁን  በምን ሁኔታ ላይ እንደምትገኝ  ማወቅ! በቃ ሌላ ጥማት የለኝም። ሞንያ የሆነባትንና የደረሰውን ሁሉ አንድ በአንድ ዘረዘረችልኝ፤ የዛሬሽ 18 ዓመት ወደ ጋና ከሄደች በኌላ....ሰዎችን አጠያይቃ ከተለያየ አገራት የመጡ ክርስቲያኖች በሳምንት አንዴ እየተሰባሰቡ የሚያመልኩበት ቦታ ጠቁመዋት ከእነርሱ ጋር ተገናኝች፤ አብራቸው የጌታን ጸጋ እየተካፈለች ከቆየች በኋላ ፤ እዚያው ቸርች በኳየር አገልግሎት ውስጥ መሳተፍ ጀመረች፤ ለሚስዮናዊ አገልግሎትም ወደ አውሮፓና ወደ ተለያዩ ቦታዎች ከሌሎች ጋር እየሄደች ታገለግል ነበር። በኋላም ሙሉ ለሙሉ ወደ ቤሩት ተመልሳ ከአበሻው ቸርች በመቀጠል ለመጀመሪያ ጊዜ በአረብኛ ጌታን ያመለከችበት ቤተክርስቲያን ውስጥ መጋቢ ሆና እንድታገለግል ተሹማ አገልግሎቷን ቀጥላለች!

መጋቢ ሞንያ በተወለደችበት ምድር ላይ ለብዙዎች አርዓያ በመሆን፣ ወንጌልን በድፍረት በመናገር አያሌዎችን ከሲኦል እያስመለጠች ሲሆን፤ ቤተሰቧ ሙሉ ለሙሉ ማለት እስኪቻል ድረስ ንስሐ ገብተው የክርስቶስ ተከታይ ሆነዋል። ነጻነትን በጥብቅ የምትጠላት  የሞንያ እህትማ በመንፈስ የተቃጠለች የወንጌል አማኝ ሆናለች፤ አባትና እናቷ አገልግሎቷን በአሁን ሰዓት በገንዘብ እየደግፉ ሲሆን፤ እህቶቿና የእህቶቿ ልጆች የቤተክርስቲያና አሸሮች፣ ሌሎቹም የህጻናት አስተማሪዎች ሆነዋል። በርካታዎች በየሳምንቱ ጌታን የሚቀበሉበት ቤ/ክ እንደሆነ መሰከረችላት፤ ከዚህ በተጨማሪ  በአሜሪካን ፣ በእንግሊዝ እንዲሁም በሌሎች አገሮች ላይ ተደጋጋሚ ጊዜ በመሄድ ወንጌልን ታገለግላለች። እህታችን ነጺ አብራን የጌታን ስራ የምትስራ የጌታ ሰው ናት። በቅርብ ጊዜ ወደ ቤሩት ሄዳ ጌታ እየሰራ ያለውን ነገር ለማየት ዕቅድ ስላላት ጸልዩላት። ክብር ሁሉ ለጌታ ይሁን!

አንዳንዶቻችን በጣም ትልልቅ የወንጌል ገድል ላንፈጽም እንችላለን፤ በርካታ የወንጌል ገድል የሚፈጽሙ እንደ ጳውሎስ፣ ፣ እንደ ቢሊግርሃም...ደግሞ እንደ ሞንያ ያሉትን የወንጌል ጀግኖች ግን ወደ ጌታ ልናመጣ እንችላለን!! ስለዚህ የምትመሰክሩለት ሰው ነገ ምን ሆኖ እንደሚገለጥ አታውቁምና ሳትታክቱ መስክሩ!** ከመሰከራችሁ በኋላ ጸልዩላቸው፣ ለመንፈስ ቅዱስም አሳልፋችሁ ስጧቸው። ሌላ ታሪክ ይቀጥላል....

<< LET US BE WITNESSES FOR CHRIST! >>

ኢጆሌ! ..ኢጆሌ..ነምኒ ኢንጅሩ?

ኢጆሌ! ..ኢጆሌ..ነምኒ ኢንጅሩ?
/ልጆች!..ልጆች!..ማንም የለም?/
      ♠♠♠♠♠♠
ሰሞኑን ከምስራቅ ወለጋ አካባቢ ሚድያዎችን ጭምር እያነጋገረ ስላለ ጉዳይ ሰምተዋል?አቶ ሂርጳ ነገሮ ይባላሉ ፤ አባወራ ናቸው ፤ከታመሙ ዓመታት ሞላቸው። አንዴ በንቀምት ከፍ ሲልም በጥቁር አንበሳ ሆስፒታል ጭምር ለመታከም ሞክረዋል። እምብርታቸው አካባቢ ነው የሚያማቸው፤ ምናልባት የጉበት በሽታ ይሆናል ብለው ይጠራጠራሉ። እንደውም የዛሬ ሁለት ዓመት ገደማ  ...ቀዶ ህክምና አድርገውም ነበር። መፍትሄ ግን አልመጣም። እናም ህመሙ ጸንቶባቸው ባለፈው ማክሰኞን ዕለትን  መሻገር ሳይችሉ ቀርተው ከረፋዱ 4 ሰዓት ላይ ነፍሳቸው ከስጋቸው ተለያየች። ገናዣቸው አቶ ኢታና ይህንን እውነታ አረጋግጠው ሬሳውን ገንዘው፣ ራሳቸው ባመጡት ሳጥን ውስጥ ከተቷቸው፤ ሳጥኑ ታሸገ! ከዚያም ቀድሞ በአካባቢው እንዳለው ልምድ ጥሩንባ ተለፈፈ፣ ግቢ ውስጥ ድንኳን ተጣለ ፤ ብዙ ጊዜ ወንዶች ይህን ሲያደርጉ ፣ ሴቶች ደግሞ በፊናቸው ለንፍሮ የሚሆን ስንዴና ሽንብራ ያዘጋጃሉ፤ ምስር ይለቅማሉ..ሌላም ሌላም...፤

የሰማ ሰው ሁሉ እየመጣ ከወዳጅ ዘመድ ጋር ያለቅሳል...ከሞቱ 4 ሰዐታት ቆይታ በኋላ ከሳጥን ውስጥ ኢጆሌ! ኢጆሌ...የሚል ድምጽ ይሰማል! በቅርበት የነበሩ የሟች እናትና ባለቤታቸው ፈርጥጠው ወደ ውጭ  ወጡ! ...ገሚሱም በድንጋጤ አካባቢውን ጥለው ፈረጠጡ፤ ከገናዡ ከአቶ ኢታንል በቀር መጠጋት የቻለ አልነበረም። << ኢጆሌ! ኢጆሌ! ነምኒ እንጅሩ!>> ደጋግመው ይናገራሉ፤ በኋላም ሳጥኑን ፈንቅለው ወጡ! ሁሉን ግርምት ሞላ! ..አመሻሽ ላይ ሚሪንዳ ቀማመሱና አቅማቸው ተመለሰ...የተሰበሰበ ብዙ ህዝብ ነበረና..ግማሹ እልልታ ያሰማል! ገሚሱ ያለቅሳል! አቶ ሂርጳ ጆሯቸው መስማት ጀመረ! ምንድን ነው? ብለው ጠየቁ፤ ተነገራቸው! ...ከሰዓትልት በፊት ሞተው ነበር እኮ አሏቸው፤..ለዚህም ነው ድንኳኑ፣ ለቅሶው...

የአማርኛ ጣቢያ ቢቢሲ ሞተው የተነሱትን አቶ ሂርጳንና አረጋግጠውና አስተክልክለው ገንዘው ሳጥን ውስጥ የከተቷቸውን አቶ ኢታናን ቃለ መጠይቅ አርጒልልቸዋል። በዚህ ክፍል ውስጥ ለአቶ ሂርጳ የቀረበው ጥያቄና መልሳቸው ተካቷል።  

፨ ቢቢሲ፡- አቶ ሂርጳ ከሞቱ በኃላ ምን ተመለከቱ? አቶ ሂርጳ ሲመልሱ:- ብዙ ነገር እንዲህ ነው ብዬ መግለጥ አልችልም። አንዳንዱ ተዘንግቶኛል...አሁን የማየው ያህል የሚታየኝ ግን ብዙ ነገር አለ!  ለምሳሌ አንድ በብረት ሰንሰለት የታጠረ የሚመስል፤ በርካታ ሰዎች የተሰበሰቡበት ግቢ አይቻለሁ..በሩ የሳንቃ ይሁን የብረት ትዝ አይላቸውም፤ እዚያ ውስጥ ከነበሩት ሰዎች ውስጥ ሶስቱን ብቻ ነው የማውቃቸው፤  አንደኛው የራሴ ወላጅ አባት ሲሆኑ፡ የዛሬ ሁለት ዓመት ገደማ ነው የሞቱት፤ ሁለተኛው ሰው አማቻቸው፤ ሦስተኛውም ሰው አጎታቸው ናቸው፤ እነዚህ ደግሞ ከሞቱ በርከት ያሉ ዓመታት አልፈዋቸዋል። ...ሰዎቹ ተከተለን ብለዋቸው ነበርና ሲከተሉ ሊደርሱባቸው እንዳልቻሉ ይናገራሉ እንደ ህልም ጉዞ አይነት ሆነ። ከዚህ ውጭ ግን እርስ በርስ ምን እንዳወጉ ትዝ አይላቸውም።

፨ ሌላው የማይረሱት ነገር ነጭ ልብስ የለበሰውን መልዐክ ነው..ኢየሱስን ይመስላል ይላሉ። ቢቢሲ አስረግጦ ለማወቅ ያዩት መልዐክ ጥቁር ነው? ቀይ? አላቸው፤ አቶ ሂርጳ ሲመልሱ  ቀይ መልዐክ ነው ፤ ነጭ ልብስ ግን ለብሶ ነበር አሉ።

፨ ቢቢሲ፡- ፊቱስ ምን ይመስል ነበር? የሰው ወይስ የመልዐክ? አላቸው።
አቶ ሂርጳ:-በእርግጥ ፊቱን በደንብ አላየሁትም። እኔ ውጭ ነበርኩ፤ እርሱ ደግሞ በውስጥ በኩል ቆሞ ነበር...ሰዎችንም ወደ ውስጥ አስገባና ይዟቸው ሄደ!

፨ ቢቢሲ ቀጠለና ሌላ መልዐክ አጠገቡ አልነበረም? አቶ ሂርጳ መለሱ አላየሁም! እርሱን ብቻ ነው ያየሁት።
ምን አለዎት?
አቶ ሂርጳ "አንተ የት ትሃልዳለህ? ተመለስ አለኝ።
በምን ቋንቋ አናገረዎት? በኦሮምኛ ነዋ!
አልፈሩም? በፍጹም! ክልከላውን/ኬላውን አልፌ መሄድ አምሮኝ ነበር ..ነገር ግን ውስጥ አልፎ ለመግባት አቅም አልነበረኝም!

፨ ቢቢሲ ወደ ምድር በመመለስዎ ቆጨዎት እንዴ?
አቶ ሂርጳ:- እዚያው ብሆን ደስ ይለኝ ነበር። አሁንም ግን ከቤተሰቤ ጋር ተመልሼ ስለተቀላቀልኩ ቅር አላለኝም።

፨ ቢቢሲ:- ከዚህ በኋላ በቀሪው ዘመንዎ ምን ማድረግ ያስባሉ?
አቶ ሂርጳ:- ከዚህ በኋላ የኃይማኖት ትምህርት በመስጠትና ሰዎችን በማስታረቅ ጉዳይ ላይ ተግተው እንደሚሰሩ ተናግረዋል።
(ምንጭ:- BBC Amharic  Nov.23 2018)

♥ ከሞት በኋላ ህይወት እንዳለ እሙን ነው። ሰዎች ወይ የዘላለምን ህይወት፤ አልያም የዘላለምን ሞት ሊወርሱ የሚችሉበት ሁለት ዕድሎች አሏቸው፤ ሲኦልም ሆነ መንግስተ ሰማይ ዘላለማዊ ቦታዎች ናቸው። አማኞች (ሁላችንም) የክርስቶስን ወንጌል ለሰዎች ሁሉ በመመስከር፡ ሰዎች ከመሞታቸው በፊት ንስሐ እንዲገቡና ከወዲሁ ምርጫቸውን እንዲያስተካክሉ እንድንተጋ አደራ እላለሁ። አቶ ሂርጳ ብቻ ሳይሆኑ እኛ ሁላችንም ወንጌልን እናስተምር! የተጣሉትን እናስታርቅ!!
------------
" እግዚአብሔር በክርስቶስ ሆኖ ዓለሙን ከራሱ ጋር ያስታርቅ ነበርና፥ በደላቸውን አይቆጥርባቸውም ነበር፤ በእኛም የማስታረቅ ቃል አኖረ።
እንግዲህ እግዚአብሔር በእኛ እንደሚማልድ ስለ ክርስቶስ መልክተኞች ነን፤ ከእግዚአብሔር ጋር ታረቁ ብለን ስለ ክርስቶስ እንለምናለን።"
                           2ኛ ቆሮ.5 ቁ 19ና 20

                 ♠♠♠♠♠♠♠
<< LET US BE WITNESSES FOR CHRIST! >> 

መታነቂያ ገመድ የምገዛበት 60 ብር ብቻ..!

መታነቂያ ገመድ የምገዛበት 60 ብር ብቻ..!

" በቦሌም ብለህ በባሌ" እንደሚባል ተሳክቶላቸው ወደምዕራባውያኑ ምድር የመጡ ሰዎች በሙሉ ማለት ይቻላል የቤተሰቦቻቸውን አልያም የጓደኞቻቸውን የኑሮ ደረጃ ለማሻሻል ብርቱ ጥረት የሚያደርጉት በድሃ አገር ያለውን ችግር ስለሚረዱ እና ለወዳጅ ዘመዶቻቸው ካላቸው ጥልቅ ፍቅር የተነሳ ነው። ስለዚህም  ሁለትና ሶስት ስራ መስራት ለብዙዎች አዲስ ነገር አይደለም።

ክርስትና በቅጡ የገባቸው ወገኖች ደግሞ  ለወዳጅ ዘመዶቻቸው ገንዘብና ምድራዊ ቁስ ከመስጠት የላቀ ምኞትና ጥማት አላቸው። ከብዙ ውጣ ውረድ በኋላ ውጭ አገር ለመኖር የመጣች የአንድ ክርስቲያን እናት ታሪክ ቀጥሎ ቀርቧል። እናኒ ሰሞኑን እንደውም  ለወገኖች ከሚላከው የቫይበር ላይ የምስክርነት ጽሁፍ ተነሳስታ ለዓመታት የሱስ እስረኛ ለሆነ፣ ህይወት አሰልቺ ለሆነበት የልጇ ባል ወንጌል መስክራ ወደ ቸርች አምጥታው  ኦክቶበር 21,2018 ጌታ ኢየሱስን እንደ ግል አዳኝ አድርጎ ተቀብሏል። ለሦስት ትናንሽ ልጆቹም ተጸልዩዋል።  በብዙ የህይወት ትግል ውስጥ ያለፈ፣ ዓለም የተጫወተችበት ሰው ነው፤ በወንጌል አምኖ ንስሐ ከገባ በኋላ  ደስታችን ወደር አልነበረውም። ሃሌ ሉያ!!  እናኒ ለቀሩትም ቤተስቦቿ ይህን  የሕይወት ዘመን ትልቅ ውሳኔ እንዲወስኑ የተቻላትን ሁሉ በማድረግ ላይ ነች። ቤተሰቦቿን እንኳን በራሷ የጸሎት ዝርዝር ውስጥ ቀርቶ እኛን እንኳ ስንት ጊዜ አደራ ብላ አሳስባናለች። ይህም ሰው እንዲጸና በያላችሁበት ጸልዩለት!

  እናኒ የሕይወት ውሳኔ አድርጋ ክርስቶስን ልትከተል የቻለችበት አስደናቂ ታሪክም አላት እነሆ፡-....
ጌታ ኢየሱስ ክርስቶስን መከተል የጀመረችው ህዳር 12,2000 ዓ.ም. ነው። ወደ ክርስቶስ እንድትመጣ ምክንያት የሆነው ነገር ደግሞ በተከታታይ ያጋጠማት ሐዘን ነበር። የልጅነት ባሏ በ1999 ዓ.ም. በመኪና አደጋ በድንገት ህይወቱን አጣ። ያን ጊዜ በድንጋጤ ወድቃ ግንባሯ አበጠ፤ ምልክቱ እስከዛሬ ድረስ ይታያል። በጣም ነበር የምንዋደደው፤የኑሯችን ብዙ ነገር እርሱ ላይ የተንጠለጠለ ስለ ነበር.. ጉዳቴን አከፋው ትላለች። የባለቤቴ ሃዘን ሳይለቀኝ ከ1ዓመት 4ወር በኋላ የምወዳት ሴት ልጄ ከቤሩት ወደ ቱርክ አገር እሻገራለሁ ብላ ከሌሎች ሰዎች ጋር በጀልባ በባህር ጉዞ ላይ እንዳሉ ሙሉ ለሙሉ ሰጥመው ውሃ በላቸው፤ የልጄ አስክሬንም ተፈልጎ ተላከልኝ፤ በጥቂት ጊዜ ልዩነት ውስጥ የምትወደውን ባል እና የደረሰች ሴት ልጇን ያጣች ምስኪን እናት ሆንኩኝ። ከዚያ በኋላ እዕምሮው እንደተነካበት ሰው ባዶ እግሬን ገዳም ለገዳም እየዞርኩ በባህላችንና- በዕምነታችን መሠረት የሙታን ተዝካር /ሙት ዓመት እያወጣሁ ገንዘቤን ቀስ በቀስ ጨረስኩ። በተለይ የልጄን 12 ካወጣሁ  በኋላ መሞት እንዳለብኝ ወሰንኩ! ..ሰይጣን አጠገቤ ቆሞ ብዙ ጊዜ የሚያዋራኝ ያህል ይሰማኝም ነበር ። አንቺ አሁን ሰው ነሽ?! እንዴት ቆመሽ ትሄጃለሽ? ሰው ምን ይልሻል? ...ለምን አትሞቺም?! ...እያለ ደጋግሞ ይወተውተኛል። ባሏንና ልጇን የምትወድ ብትሆን ኖሮ እንዴት እንደዚህ ቆማ ልትሄድ ቻለች? እያሉ ጎረቤቶች የሚያሙኝ ያስመስልብኝ ነበር። ጥቁር ልብሴም አልወለቀ! ሞራሌም ተሰባበረ፣ የልቤም ሆነ የኑሮዬ አቅም ወደቀ! ብቸኝነት ተሰማኝ፤ በተለይ ዓመታዊ በዐላት ሲመጡ ድሮ የለመድኩት በግና-ዶሮ ቀረ! ገና ያልጠነከሩ አንድ ወንድና ሌላ ሴት ልጄ ይከፉቸዋል ብዬ እጨነቃለሁ ። እነዚህ ሁሉ ነገሮች ተደራርበው ...መሞት እንዳለብኝ ወሰንኩ።

ባለቤቴ ሲሞት 300 ሺህ ብር ያህል ባንክ ውስጥ ተቀማጭ ነበረን፤ አሁን 60 ብር ብቻ ቀርቷል፤ እርሱ ደግሞ ገመድ መግዣ ይሆነኛል ብዬ ሌሊትና ቀን ከራሴ ጋር ሟውራት ጀምሬያለሁ። አንድ ቀን ልጄን ከቀበርኩ 12ኛው ቀን በኋላ በጠዋት 12 ሰዓት / 6AM/ ላይ ተነሳሁና ለልጆቼ እንጀራ ጋገርኩ፣ ወጥ ሰራሁ ፣ ልብሳቸውን አጣጠብኩና መታወቂያዬን፣ የእነርሱንም ፎቶ ይዤ ከእንቅልፍ ሳይነሱ የምታነቅበትን ገመድ ይዤ ከቤት ወጣሁ፤ መካኒሳ ሰፈር አካባቢ <አቦ ቤ/ክ> ጫካ ውስጥ ለመታነቅ ወስኛለሁ፤ አንድ ወፍራም የወይራ ግንድ ላይ ገመዱን ሸምቀቆ ሰርቼ፣ አስሬና አስተካክዬ ፡ ባሌና ልጄ ወደተቀበሩበት  ቦታ  መጣሁ (እዚያው አቅራቢያ ነበር)፤ ለሁለቱም ሟቾች ሻማ ለኩሼ ለደቂቃዎች አለቀስኩ ፤ "ልመጣላችሁ ነው!" እያልኩ ነበር የማለቅሰው፤ ውስጤ በኃይል ሲነድ ይሰማኛል፤ አስተኝቻቸው የመጣኋቸው ህጻናትም በአዕምሮዬ ይታወሱኛል፤ በሌላ አንጻር የሰይጣን ክስ   አለብኝ። እሞትና... መታወቂያዬንና የልጆቼን ፎቶ ያዩ እሬሳዬን አፈላልገው ለቤተሰቤ ይሰጡልኛል፤ በዚህ ላይ አባቴና ሌሎች ዘመዶቼ ለልጄ ለቅሶ ከጎንደር መጥተው አቅራቢያዬ ነው ያሉት፤ ለቀብሩም ሳይቸገሩ በዚሁ ይገላገላሉ!  እያልኩ ውሳኔዬን በአዕምሮዬ እያጠናከርኩ ነበር የማለቅሰው፤ ከዚያም ጨርሼ፡ ለመታነቅ ወዳዘጋጀሁት ስፍራ ስወርድ፤ መንገድ ላይ ከአንድ ሰው ጋር ተገናኘሁ፤ የቀብር ጉድጓድ በመቆፈር የታወቀ "መ??ይ" የሚባል የአካባቢዬ ሰው ነው። አንቺ ሴትዮ...! በሚል  ከፍ ባለ ድምጽ ንግግሩን ጀመረ፤...እንዚህን ህጻናት ትተሽ ጫካ ለጫካ ለምን ድነው የምትዞሪው? ለልጆሽ መኖር አይሻልሽም? ወይም ብትሞቺ ይሻልሻል!! ቀጠለ ንግግሩን...ወይም መፍትሄ የምትፈልጊ ከሆነ ደግሞ አሩሲ... አንድ አዋቂ ቤት አለ እዚያ ልውሰድሽ/ጥንቆላ ቤት መሆኑ ነው/፤ እዚያ ለሦስት ወር ቀጥ ብለሽ ካገለገልሻቸው ልጅሽንና ባለቤትሽን እንድታናግሪ በሙታን ጠሪ መንፈስ ያገናኙሻል...ወዘተረፈ አለ። እኔ ደግሞ በልጅነታችን ጠንቋይ ቤት እንዳንሄድ! ከቤተሰባችን መሃል የሚሄድ ካለ ርጉም ይሁን  ተብሎ ከተወሰነበት ቤተሰብ ነው ያደኩት! መሄድ አልወድም! ...በብዙ ሌላ ቃላት አባበለኝ፤..እስቲ ተመልከች! በቀደም ዕለት 15 ጉድጓድ እንድቆፍር ትዕዛዝ የሰጠኝ የኡሩሲው ጠንቋይ... ፤ ገና አንድም ሰው ሳይሞት 15 የቀብር ጉድጓዶች አስቆፈርኩ በዚያን ቀን 5ቱ ሞቱና ተቀበሩ፤ በተቀሩትም ጥቂት ቀናት 10ሩም ጉድጓዶች ውስጥ ሰው ተቀብሮበታል። ይታይሽ! አለኝ፤ ...ሰውየው የከብት እርባታ ያለው፣ መኪና  ያለው ሃብታም ቢጤ እንደሆነ አውቃለሁ፡፡ ያን ሁሉ ንብረት ያፈራው  በጠንቋዩ እየተመራ ፣ጉድጓድ እየቆፈረ፤ ለ40ና 80 ተዝካር ለሟች ቤተሰቦች በሬ እየሸጠላቸው ነው።... ይህን ሁሉ ዝባዝንኬ ሲያወራ ቆሜ ሰማሁት፤ ነገር ግን አሁን እርሱ እያለ ታንቄ መሞት የለብኝም! ትንሽ ደቂቃ ወደ አስፋልቱ ልውጣና ሰውየውን ላሳልፈው፤ ብዬ ከጫካው ውስጥ ወጥቼ ወደ አስፋልቱ መንገድ ሄድኩ።

   እዚያ እንደ ደረስኩ ወዲህና ወዲህ ስል የባስ ፌርማታ አጠገብ ደረስኩ፤ አጠገቡ የቆመ ስልክ እንጨት አለ፡፡ እንጨቱ ላይ ደግሞ የተለጠፈ አንድ ጽሁፍ አየሁ፤ "ፖስተር"- የኮንፈረንስ ማስታወቂያ ነው። <<መዳን በኢየሱስ ክርስቶስ ነው! ፤ ..እመን እንጂ አትፍራ!  ይላል >> እነዚህ መናፍቃን ናቸው! ብዬ ማሾፍ ጀመርኩ! ግን ጽሁፉ ውስጤ ቀረ! በአፌ" እነዚህ አታላዮች፣ ሌቦች... እላለሁ፤....ከልጅነቴ ጀምሮ ስለ ፕሮቴስታንቶች ያለኝ ስዕል የተበላሸ ነው፡፡ "ጨለማ ክፍል ውስጥ ገንዘብ በኮርኒስ ውስጥ የሚበትኑ..፤ የድመት ስጋ የሚያቆርቡ፣ በሰው 50 ብር እየተቀበሉ አዳዲስ ሰው የሚሰብኩ!"....."ድሮ ድሮ እንደውም የእናቴ ታላቅ ወንድም አማኝ ነበረ፤ እኛን ለመጠየቅ እቤታችን ሲመጣ እንኳ በእጁ አንጠልጥሎ የሚመጣውን ፍራፍሬ... ዘፍዝፈን፣ በብዙ ውሃ አጥበን ነበር የምንበላው ጴንጤ ስለሆነ ተጸይፈነው..። ስልክ እንጨቱን ይዤ እንዲህ አልኩ። <<እውነተኛው የድንግል ማርያም ልጅ ከሆንክ፣ አስቲ  ካዘጋጀሁት ከዚያ ገመድ አስጥለህ ለልጆቼ አኑረኝ! በዚህ እፈትንሃለሁ! አልኩት። ድንገት ሳላውቅ ፖስተሩ የተለጠፈበትን ስልክ እንጨት ተጠምጥሜ ይዣለሁ፤ አውሎ ነፋስ ከፊት ለፊቴ በኩል ሲነሳ አየዋለሁ..ብዙ ግሳንግስ ሰብስቦ ወደ እኔ ተጠጋ፤ አንዲት ድንቢጥ ወፍ ውስጡ ትታየኛለች፤ አይኔን ለታጠፋው ይመስላል እና እጄን እያወራጨሁ ተከላከልኳት፤ መሬት ላይ ወደቅኩ! ከደቂቃዎች በኋላ ስነሳ፡ በርካታ ሰዎች ከበውኝ ከንፈራቸውን ይመጣሉ። የተለኮሰ ክብሪት አጠገቤ አለ። የሚጥል በሽታ ነው ብለው አስበው ይህን እንዳደረጉ ገባኝ! የእኔን ትግል ማን አየ?!

ተነሳሁና ከበባውን ሰንጥቄ በመሄድ ፌርማታው ጋር የተቀመጠ አንድ ተለቅ ያለ  ሰው ጋር ተጠጋሁ፤ ይህ ማስታወቂያ ያለበትን ቤ/ክ ጠቁመኝ! አልኩት። ምነው አናቴ? አለኝ! መናፍቃን እኮ ናቸው፤ እዚያማ በፍጹም እንዳትሄጂ ! ይልቅስ  እዚህ ጋር ኪዳነብረት አለልሽ! እዚያ ጋርም ገብርኤል ቤ/ክ አለልሽ አለኝ በእጁ ምልክት እያሳየ! አአይ ለቅሶ ልደርስ ፈልጌ ነው ፤ ቦታው ደግሞ ቸርቹ ፊት ለፊት ነው፡ ስለው፤ ሰሞኑን አንድ ለቅሶ የነበረባት፥ ሴት ልጇ አረብ አገር የሞተችባት እና ባሏንም በሞት ያጣች ..ብሎ የእኔን ታሪክ ለራሴው ሳይጨርስ ተወው! እርሷን አውቃታለሁ፤ እርስዋ ሳትሆን ሌላ ሰው ነች! አልኩት። አደራ እንዳትጠጊያቸው! ብሎ ቦታውን በርቀት ጠቆመኝ። ወደዚያ አመራሁ FBI ቸርች ገና አዳራሹ እየተሰራ ዕቃዎች ብትንትን ብለው ይታያሉ፤ ተጠጋሁ ግን  በታች በኩል ነበር የሄድኩት፤ ዘበኛውን በአጥር ላይ አናገርኩት! ምን ፈልገሽ ነው? አለ ዘበኛው። " ወደ ወንዝ ልትገባ ያለችን ነፍስ የሚያድን! አልኩት" በደንብ ስላልገባውና እንደ ጤነኛም ስላልቆጠረኝ በላይኛው በር ዞሬ እንድመጣ ጠቆመኝ። ዞሬ መጣሁ፤ በዋናው በር ገብቼ የቅድሙን ቃል ደገምኩለት " ወደ ወንዝ ልትገባ ያለችን ነፍስ የሚታደግ ሰው ፈልጌ ነው! የመጣሁት፡፡" ወዲያው አንድ ወንጌላዊ ተጠራ፤ ወ/ዊ መንግስቴ ይባላል፤ አናገረኝና ይዞኝ ወደ ጸሎት ቤት አመራን ፤ እርሱ ከፊት ለፊት እየመራኝ እኔ እየተከተልኩት ነበር። ድንገት መሃል መንገድ ላይ ግን እኔ ቆምኩ በእውነት መንቀሳቀስ አልቻልኩም! የተከተልኩት መስሎት ነበር ፤ ሲያጣኝ ተመልሶ መጣ፤ ቆሜያለሁ። ምነው አለ? አልቻልኩም አልኩት! ገባውና መጸለይ ጀመረ፤ ሌሎች ሶስት አገልጋዮች መጡ.. እስኪያልባቸው ድረስ ጸለዩ ገሰጹ። ያ ቅድም ያየሁት አውሎ ነፋስ ያቺን ድንቢጥ ይዞ ዳግመኛ ሲመጣ ይታየኛል፤ እንደ ቅድሙ ግን አጠገቤ ሳይደርስ ተበትኖ ጠፋ! እግሬንም ለቀቀኝ ጸሎት ቤት ገብቼ ወንጌልን መሰከሩልኝ ክርስቶስን አዳኜና ጌታዬ አድርጌ ተቀበልኩ።

ወደ-ጫካው ተመልሰን ሄደን ገመዱን ፈታነው ፎቶዎቹንና ሌሎች እቃዎችን ይዘን መጣን። ከዚህ በፊት እዚያ ቦታ ቢያንስ አምስት ሰው ታንቆ እንደሞተ እስታውሳለሁ። በተለይ እኔ ገመድ ያንጠለጠልኩበት የወይራ ዛፍ ደግሞ አንድ ጎረቤቴ ታንቃ የሞተችበት ዛፍ ነው፤ ባሏንና ሁለት ልጆቿን በከባድ የመኪና አደጋ ካጣችበት ጊዜ ጀምሮ ባጋጠማት ሃዘን ምክንያት ነው፡ ይህን መጥፎ ውሳኔ የወሰነችው በህይወት የለችም። እኔን ግን ዛሬ  ኢየሱስ  ከሞት አድኖኛል። የሞቴን ገመድ በጥሶታል!!  ለ3 ቀናት ተመላልሼ የዳንኩበት ቤ/ክ ውስጥ የድነት ትምህርት ተማርኩ። በኋላም ጌታን መቀበሌን የሰሙ ክርስቲያን ጎረቤቶቼ ቀረቡኝ  አቅራቢያዬ ወደሚገኝ ቸርች አስፈቅጄ አብሬያቸው እንድመጣ ነገሩኝ፤ እኔም ለመጋቢዎች ነገርኳቸው ... የቀረኝን የድነት ትምህርት በሙሉ ወንጌል ቤ/ክ ውስጥ ተምሬ የውሐ ጥምቀት ወሰድኩ። የጥምቀት ስነስርዓቴ የሰርግ ያህል የደመቀ ነበር የእኔ ብትሉ የህዝቡ ደስታ ወደር አልነበረውም። ሃሌ ሉያ!!!
   እናኒ ከዚያም በኋላ መከራው በቅቷል አላለችኝም፤ ያው አንዳንድ ነገር አይጠፋም ፤ ለምሳሌ ድሮ ያውቋት የነበሩ ጎረቤቶች ከቸርች ስትመለስ ቆሻሻ ውሃ እየደፉባት  ቢያንስ 3ት ነጠላ ቀይሬያለሁ አለች! ልጆቿን እያሳደሙባትም የተወሰነ ጊዜ መከራ ቀምሳለች፤ ...እየመጡ እናታችን አዋረድሽን፣ አሸማቀቅሽን ይሏታል፤  ይህ አይነት መከራ ግን ስለ ስሙ ነው፤ ለኛ ክብር ነው! ጌታም በብዙ ሁኔታ አጽናናኝ አለች፤ በቀበሌያችን ውስጥ ከሚገኝ <ራሴድ >በሚባል ማህበር ውስጥ ታቅፌ፣ ስልጠና ወስጄ በአነስተኛና ጥቃቅን ንግድ ውስጥ ለመሰማራት 500 ብር ብድር ተሰጠኝ ፤ እየነገድኩ በወር 50 ብር አጠራቅም ነበር። ልጆቼን በግል ከፍዬ እስተማርኩ ዛሬ ሁለቱም ኮሌጅ ተመርቀዋል፤ ወንዱ ንግድ ላይ ተሰማርቷል፣ ሴቷ የማስተርስ ዲግሪ ቀጥላ እየተማረች ትገኛለች፤ እናኒ ወደ አሜሪካ ስትመጣ ከዚያች 500 ብር ተነስታ በአካውንቷ ውስጥ 60ሺህ ብር ተቀማጭ ነበራት፤ ዛሬ አብራን ጌታን እያከበረች ትገኛለች፤ መከራዋን ሁሉ ታሪክ አድርጎላታል፡፡

እናኒ ጌታ አብዝቶ ይባርክሽ! ክብር ሁሉ ለእግዚአብሔር ይሁን! እስከ ፍጻሜ ድረስም በቤቱ አጽንቶ ያቁምሽ! አሜን!

ወገኖች አሁንስ ቢሆን በየአካባቢያችን ስንት እናቶችና እህቶቻችን ገመድ ይዘው ለመሰቀል እየተንከራተቱ ይሆን?<< ወደ ወንዝ እየገባች ያለችን ነፍስ የሚታደግ ሰው አለ?>> ማንን ልላክ? ማንስ ይሄድልኛል? ይላል ዛሬም፤ ጌታ ሆይ እኔ አለሁልህ! እኔን ላከኝ! እንበል፤ ሌላ ታሪክ ይቀጥላል...

<<LET US BE WITNESSES FOR CHRIST>>